Jos was ‘ne sportman ien hart en niere, tennisse, biljarte, volleye, skië, kaarte en âltied wille winne, alliën al umdet ge beej ’n spel mòt wille winne. ’t Was alles of niks.
Jos was ‘ne mins mit vaste gewoëntes, ‘s maerges onder ’t schaere 10 bladzijde uut ’t fotoalbum bekiêke, iederen dag ’t journaal opneme, zondagsaoves Studio Sport mit shoarma, biljartgemiddeldes beejhâlde en winst of verlies beej ’t zwikke opschriêve.
Jos hiêl ’t allemól beej, Ok van wat ‘r ien en um ’t huus gedaon mos worre wiere liesjes gemakt en heej was echt verbaasd det heej daorien d’n ennigste was.
Techniek en Jos ware gen vriende. Computer, wriêftillefoon, dor woj heej aegelek nie án.
’t Opneme van tillevisieprogramma’s het Jos veul gevechte mit de techniek opgeleverd. De gekôchte harddiskrecorder wier wer gaûw iengeruild vör de vertrouwde VHS recorder. Die voldeuj wel án Jos zien wense, dor kos heej wel mit umgaon.
Jos smeet nie mit geld, heej was daor hiël precies in. ’t Verbaasde òns dörum det Jos ien 2005 de beejdrage vör ’t weekend dubbel betálde, twië kier 160 euro en dè haj nie ien de gate. En dè was hiël bijzonder. Op ’t weekend wier Jos wies gemakt det heej de traditionele kwis gewonne haj.
Heej haj ‘ne vette pries van 160 euro te pakke. We hebbe hiël lang motte praote um Jos ‘r van te ovvertuuge det hééj ’n foutje haj gemakt en nie wééj.
Al jaore geleeje stelde Jos vör um de zörgkôste te verliëge. Jos haj ontdekt det 75% van die kôste gemakt worre ien ’t laeste laevesjaor. Jos haj ’n aeve doeltreffende as effectieve oplossing: ’t spuitje. Òp òw tachtigste verjäördag wier ‘r dör ’n verpleger, ien Jos zien geval verpleegster, op ’t aend van ’t feest ’n spuitje gebrocht en dè was ’t dan.
Jos wilde zien idee baest ánpâsse. Nó de verhoëging van de pensioengerechtigste laeftied wier 80, 82 jaor. ’t Leverde moie aovende òp mit veul discussie en ángeziên Jos d’n aldste was wiere d‘r planne gemakt hoe Jos dees spuit zeuj kriêge.
Dinsdag huurde weej tot onze groëte schrik dè Jos zien spuitje naoit mer nuëdig zal hebbe.
Jos was ien goei Lóns, ’n plekboks. Âltied de laeste, zoë ok afgeloëpe zondag. Nó de Bonten Aovend wier heej um ongevaer 2 uur vriendelek verzocht um nor huus te gaon.
Host altied de laeste, behalve vandaag.
Dizze kier is heej d’n urste.
